Erklärung

La lecziun entscheiva cul giug dallas sutgas. Quel gida da memorisar il scazi da plaids en connex cun tschaveras e procura per in'autra constellaziun da seser (en in rudi e tuts sin lur sutga). La scolasta ha preparau differentas cartas che cuntegnan mintgamai ina tratga (model da copiar). Mintga student sedecida per ina dallas suandontas gruppas: prespisa, spisa principala, dessert, bubronda. Silsuenter sesan tuts el rudi sin ina sutga. La scolasta tegn il mun da cartas cul tgau engiu enta pugn ed aulza l'emprema carta. Cuntegn la carta per exempel ina vivonda dalla gruppa dessert, astgan tut ils students che han eligiu quella gruppa ruschnar in plaz a dretg. Sesa gia enzatgi sin quella sutga, san ils students seser silla schanuglia da quella persuna. Silsuenter tila la scolasta la proxima carta. Ils students pertuccai astgan puspei seruschnar ina sutga a dretg, dano quels che han in auter student silla schanuglia. La scolasta aulza carta per carta ed ils students seruschnan vinavon. El decuors dil giug eis ei pusseivel che treis ni plirs students serimnan sin ina sutga. Ir vinavon astga denton adina mo quel che sesa il pli sisum. Il student che sesa sco emprem puspei en siu plaz d'origin gudogna il giug.

Sligaziun

Erklärung

Sco preparaziun pil proxim exercezi da tedlar fa la scolasta ella rolla dalla cameriera il tur tras il rudi da sutgas e damonda mintga student, tgei ch'el vessi bugen da beiber. Ella noda tut sin in cedel. Silsuenter di ella ch'ils students seigien el proxim exercezi ils cameriers che stoppien nudar quei ch'ils hosps empostien els dialogs. Ils students tuornan anavos en lur plazs, survegnan ils models da copiar e prendan zatgei da scriver enta maun. Lu teidlan els ils dialogs e nodan quei ch'ils hosps empostan. La scolasta fa en quei temps il tur tras las retschas e porta als students zatgei da beiber en cups (il meglier quei ch'els han empustau). Ils resultats vegnan alla fin discutai el plenum.

Sligaziun

Erklärung

Ils students scrivan las construcziuns ella dretga colonna dalla tabella. Per finir cumpleteschan els la tabella cun mintgamai duas autras construcziuns ch'els han udiu els dialogs ni formulau sezs. En quei connex sa la scolasta far attents il students al diever dil cundiziunal. Ella sa declarar ch'il diever dil cundiziunal el connex da quels dialogs corrispunda per gronda part al diever dil conjunctiv II per tudestg («Könnten Sie mir eine Serviette bringen?»). La scolasta sa nudar ils verbs che vegnan duvrai en quei connex vid la tabla e far encurir ils students las fuormas da verbs ellas construcziuns ch'els han nudau. 

Erklärung

La scolasta va aunc inaga cun in cedel da notizias tras las retschas e pren si las empustaziuns dils students. Ella curregia, sch'ei fa da basegns.

Erklärung

Persuls ni en gruppas da dus creeschan ils students in'atgna carta da menu, quei sil model da copiar che la scolasta reparta. Ils students astgan duvrar leutier igl agid dil vocabulari (digital). Cura ch'els han finiu, san els schar curreger la scolasta lur pensum e scriver la carta da menu da schuber (e senza sbagls).

Erklärung

La scolasta plazzescha ussa differentas meisas cun mintgamai duas sutgas en stanza, aschia che la situaziun imitescha la posiziun da seser en in'ustria. Mintga student ni studenta pren ussa sia carta da menu e seplacca sin ina dallas sutgas entuorn las meisas. En fuorma da speeddating lavuran mintgamai dus students ensemen e giogan il dialog sco quei ch'el capeta en in'ustria cun empustar las spisas. Suenter mintga empustaziun vegn puspei midau plazs, aschia che adina auters sesanflan e san far empustaziuns tenor novas cartas da menu. La scolasta observa il cunfar e segida ni curregia tenor basegns. Suenter che tuts han empustau tier tuts, tuornan ils students puspei anavos en lur plazs e discuteschan las damondas el plenum.