Sligaziun

Buna sera ensemen. Jeu hai num Silvio Dietrich e stun cun mia partenaria Rahel e miu fegl Nevio Gion a Strada. Sco scolast e meinascola hai jeu tgamunau biars onns la scola da Glion. Jeu possedel in'atgna fatschenta da cussegliaziun e lavurel parzialmein ella direcziun dalla Lia Rumantscha. En miu temps liber gaudel jeu mia famiglia.

Bien di ensemen. Miu num ei Pietro Jacomet. Carschius si sun jeu a Falera e Rabius en Surselva. Suenter mes studis da historia e geografia a Turitg  sun jeu turnaus en Surselva e lavurel ussa sco scolast al gimnasi claustral da Mustér. Mes hobis ein ir cun velo, far turas e dar ballapei. 

Bien di. Miu num ei Romina Simonet. Jeu hai fatg mes studis a Berna, mo lavurel dapi treis onns sco miedia a Mustér. Jeu zambregel bugen, mo il bia da miu temps liber passentel jeu cun miu um e cun mes dus affons, Lorina e Silas. 

Hallo ensemen. Miu num ei Ivan Muoth ed jeu sun carschius si el pli bi vitg dalla Surselva, si Breil. Avon quater onns hai jeu terminau miu emprendissadi da scrinari ed ussa sun jeu gest el militer. En miu temps liber mon jeu bugen a cuolm, dun cun pissiun troccas ed hai tschaffen da cantar en in chor da project. 

Bien di. Miu num ei Carla Guldimann. Jeu sun carschida si a Trun ed hai fatg igl emprendissadi da gidontra da miedi. Dapi entgins onns sun jeu denton sur memezza ed hai ina pratica da terapia da flad. Miu temps liber ei plitost scarts, mo sch'jeu hai peda mon jeu bugen els cuolms ni a far cuorsaliunga.

Hallo ensemen. Miu num ei Jessica Caprez ed jeu sun mesa spagnola. Carschida si sun jeu a Rabius e stun ussa ensemen cun miu um e mia feglia la Sia Alexandra a Glion. Professiunalmein hai jeu duas pissiuns. Jeu sun cussegliadra da viadis e lavurel dasperas aunc sco redactura tiel radio. En miu temps liber malegel jeu bugen comics e passentel mias fins d'jamnas si mises.

Hallo e bien di. Jeu hai num Silvia Casutt-Derungs e stun dapi 35 onns a Falera. Jeu sun maridada ed hai dus fegls carschi e dapi nov meins sun jeu loscha tatta d'ina biadia. Empriu hai jeu da commercianta, hai luvrau en differentas plazzas e sun dapi dus onns pensiunada. Duront biars onns sun jeu s'engaschada politicamein. Ussa gaudel jeu miu temps liber ensemen cun miu um ella natira, silla plazza da golf ed igl unviern cun ir cun skis.

Hallo. Miu num ei Thomas Candrian ed jeu vivel cun mia famiglia a Sagogn, nua ch'ei plai zun fetg a mi. Jeu hai empriu da laborant da chemia, mo ussa lavurel jeu sco informaticher en ina gronda fatschenta. En miu temps liber accumpognel jeu savens mes affons silla plazza da ballapei. E sch'jeu hai inaga peda per mei, lu legel jeu in cudisch ni ch'jeu s'interesseschel per films ni per tecnologia.

Erklärung

Mintga student survegn ina part dil model da copiar. El elegia ina persuna prominenta ch'el descriva tenor igl exempel. Il fegl vegn cumpletaus cun ina fotografia dalla persuna. La scolasta rimna ils fegls da mintgin. Tals vegnan tagliai dapart e reparti cul tgau engiu enamiez la meisa. El plenum vegn dau in memori culs fegls. Sche la fotografia vegn scuvretga sco emprem, sa il student dir silmeins ina construcziun davart la persuna. Cura che tuts pèrs ein anflai, ei il giug alla fin.

Erklärung

La scolasta pren cun ella diesch fotografias da persunas prominentas e presenta quellas fotografias el plenum. Ils students emprovan da dir co che las persunas sepresentassen.

Varianta:

La scolasta reparta a mintga student ina fotografia. Ils students descrivan la persuna senza dir il num, ils auters legnan tgi che la persuna savess esser.