Erklärung

La lecziun cumainza cul gö da las sopchas. Quel güda a memorisar il s-chazi da pleds in connex cun mangiativas e bavrondas e procura per ün oter uorden da tschantar (tuots tschaintan sün üna sopcha in ün rinch). La magistra ha preparà differentas cartas chi cuntegnan adüna ün trat (guarda il model da copchar). Mincha student as decida per üna da las seguaintas gruppas: antepast, past principal, dessert, bavronda. Lura piglian tuots plazza sün üna sopcha aint il rinch. La magistra tegna in man il plic da cartas cul cheu ingio e doza giò la prüma carta. Scha quella cuntegna per exaimpel ün dessert, das-chan tuot ils students chi han tschernü quella gruppa as spostar per üna plazza a dretta. Sch'inchün sezza fingià sün quella sopcha, pon ils students tschantar sülla schnuoglia da quella persuna. Lura piglia la magistra la prosma carta. Ils students pertocs das-chan darcheu as spostar sülla prosma sopcha a dretta, cun excepziun da quels chi han fingià ün oter student sün lur schnuoglia. La magistra doza üna carta davo tschella e'ls students as spostan inavant süllas sopchas. I'l decuors dal gö esa pussibel cha trais o daplüs students tschaintan sülla schnuoglia dad oters sülla listessa sopcha. As spostar das-cha in quel cas be quel o quella chi tschainta il plü süsom. Il student chi tschainta sco prüm darcheu sün sia sopcha da partenza ha guadagnà il gö.   

Sligaziun

Erklärung

Sco preparaziun al prossem exercizi fa la magistra da camariera. Ella va tras il rinch da sopchas e dumonda a mincha studenta ed a mincha student che ch'els giavüschessan da baiver. Ella nota tuot sün ün scrittin. Lura declera ella als students ch'els stopchan far i'l prossem exercizi svess da camariers e notar tuot quai cha'ls giasts postan. Ils students tuornan a lur plazza, ingio ch'els survegnan il model da copchar e piglian alch da scriver in man. Lura taidlan els ils dialogs e notan quai cha'ls giasts postan. La magistra fa intant il gir tras ils bancs da scoula e porta als students alch da baiver (il meglder quai ch'els han postà) in magöls. Per finir discutan ils students insembel ils resultats. 

Sligaziun

Erklärung

Ils students scrivan las frasas aint illa dretta colonna da la tabella. Per finir cumpletteschan els la tabella cun adüna duos otras frasas ch'els han dudi i'ls dialogs o formulà svess. In quel connex po la magistra render attent als students a l'adöver dal cundiziunal. Ella po declerar cha l'adöver dal cundiziunal in quels dialogs correspuonda per gronda part a l'adöver dal conjunctiv II in tudais-ch ('Könnten Sie mir eine Serviette bringen?'). La magistra po notar ils verbs chi vegnan dovrats in quel connex vi da la tabla e far tscherchar als students las fuormas ch’els han notà illas frasas.

Erklärung

La magistra va amo üna jada cun ün taquint tras ils bancs da scoula e piglia sü las postaziuns dals students. Ella corregia, schi fa dabsögn. 

Erklärung

Ils students creeschan sulets o in gruppas da duos ün'aigna carta da menüs i'l model cha la magistra tils scumparta. Els das-chan dovrar per quella lezcha l'agüd dal vocabulari vallader (digital). Cur ch'els han fini, pon els laschar correger lur carta a la magistra e scriver la carta da menüs in net (e sainza fals). 

Erklärung

La magistra plazzescha uossa plüssas maisas cun adüna duos sopchas in stanza da scoula, sco schi's füss in ün'ustaria o in ün restorant. Ils students e las studentas piglian lur cartas da menü e sezzan giò süllas sopchas intuorn las maisas. Els fan adüna in duos ün dialog in fuorma da speeddating, sco quai cha quel po avair lö in ün'ustaria o in ün restorant, ingio chi's posta damangiar e dabaiver. Davo mincha postaziun vaina müdà plazza, uschè cha adüna oters pêrins as chattan per far postaziuns tenor nouvas cartas da menü. La magistra observa ils dialogs e sustegna o corregia in cas da bsögn. Davo cha tuots han postà pro tuots, tuornan ils students darcheu a lur plazza e discutan insembel las dumondas.