professiun, manster
Ils students guardan il video ed ingiavinan che chi vain descrit. In classa vegnan decleradas las expressiuns 'professiun' (Beruf, Berufszweig) e 'manster' (Beruf, Handwerk) e congualà cullas linguas d'origin.
Ils students lavuran in gruppas da 2-4 persunas. La magistra copcha ils models tenor il nomer da gruppas. Ella taglia oura las cartas e scumparta ils sets da cartas a las gruppas. Ils students prouvan d'attribuir in gruppa ils purtrets als drets pleds. La magistra corregia il resultat da l'incumbenza. Lura giovan ils students ün memori da mansters cullas cartas.
| 1. | la fuornera |
| 2. | il magister |
| 3. | il daintist |
| 4. | la giardiniera |
| 5. | il falegnam |
| 6. | la mecanicra |
| 7. | il pilot |
| 8. | l'installatur sanitari |
Ils students ingiavinan che mansters cha'ls uffants descrivan (model da copchar). La magistra declera ils pleds incuntschaints e scriva quels vi da la tabla.
Ils students legian las frasas illa tabella e fan üna crusch in quella colonna chi s'affa il meglder cun els svess. Dumondas d'incletta pon els provar da schoglier in gruppas pitschnas o cun sustegn da la magistra. Las linguas suotvart illa tabella cumpletteschan ils students cun aignas activitats o capacitats.
Per evaluar l'actività prelegia la magistra las singulas frasas e'ls students stan sü, sch'els pon respuonder cun 'schi' (la crusch in üna da las duos ultimas colonnas). Mincha student preschainta implü üna da las activitats o capacitats ch’el ha formulà svess.
Ils students tscherchan in classa o in gruppa mansters chi s'affan bain cun mincha actività o capacità nomnada survart. Els notan quels mansters suot la frasa ainten la tabella da la lezcha precedainta.
Mincha student descriva uossa (sco las persunas i'ls videos) svess seis manster o ün manster chi vain avant suvent in sia famiglia. El fa notizchas in seis quadern da scriver e preschainta lura il manster a la gruppa. Quella ingiavina ils mansters, e la magistra nota vi da la tabla tuot ils mansters chi nu sun amo gnüts manzunats in quist chapitel.
Ils students implischan la tabella culs mansters da lur confamiliars sco eir da lur amis ed amias e cumpletteschan la tabella cun duos ulteriuras persunas da lur ravuogl. Las tabellas vegnan congualadas in gruppas da duos. Las dumondas vegnan discusas in classa.
Ils students fan insembel l'actività dals mansters. Ün o duos students vegnan davantvart e guardan vers la gruppa. La magistra copcha il model (model da copchar) sün ün fögl A3 e taglia oura ils singuls mansters. Lura preschainta ella adüna ün manster a la gruppa, uschè cha las persunas davartvart nu vezzan da che manster chi's tratta (per exaimpel cun tgnair sü il scrittin davo la rain dals duos students chi stan davantvart). La gruppa fa lura movimaints tipics per quel manster (sainza pleds e rumurs) e quels davantvart prouvan d'ingiavinar il manster. I's po müdar las rollas davo ün pêr mansters, uschè cha mincha student das-cha gnir üna jada davantvart ad ingiavinar. La magistra nota las expressiuns rumantschas dals mansters chi nu sun amo gnüts trattats vi da la tabla.
Las dumondas vegnan discusas in classa. Avant co tematisar l'ultima dumonda (Che füssast tü dvantà/dvantada jent plü bod?), scumparta la magistra a tuot ils students ün scrittin, ingio ch'els notan che ch'els füssan jent dvantats plü bod. La magistra ramassa lura ils scrittins e tils prelegia ün davo tschel. Ils students ingiavinan in classa che cha minchün dad els füss dvantà jent plü bod.