Certas finiziuns ch'ins sa aschuntar ad in plaid per crear auters plaids dalla medema famiglia numnan ins suffixs.

Ins sa distinguer denter auter ils suandonts suffixs:

• suffixs diminutivs che fan la caussa pli pintga: -et/-etta, -in/-ina, -ut/-utta

il cudischet, la strietta, il larmin, Gionin, Evalina, il manut

• suffixs augmentativs che fan la caussa pli gronda ni pli intensiva: -un/-una, -aglia

la stivuna, il buobun, la ferdaglia

• suffixs pigiurativs che fan la caussa mendra: -atsch/-atscha, -anchel, -em

il bienatsch, il puranchel, il paterlem

• suffixs collectivs ch'expriman in diember nundeterminau: -aglia, -am/-om

la buobanaglia, la magistraglia, la vermaneglia, la narramenta, il scartiram, il cagliom, il gaglinam

Era suenter quels plaids collectivs stat il verb adina el singular:

La magistraglia fa in viadi.

Quella vermaneglia ei disgustusa.